மெதுவாக மூடப்பட்டு வரும் ஓசோன் படல ஓட்டை

ஓசோன் படத்தில் ஏற்பட்டுள்ள ஓட்டை மெதுவாக மூடப்படுவதாக ஐக்கிய நாடுகள் சபை தகவல் வெளியிட்டுள்ளது. சூரியனிலிருந்து வருகின்ற புறஊதாக் கதிர்கள் நேரடியாக பூமியை அடைந்தால் உயிரினங்களுக்கு டி.என்.ஏ. குறைபாடு, புற்றுநோய் உள்ளிட்ட பல நோய்கள் உருவாகும் அபாயம் உள்ளது. இந்த ஆபத்தில் இருந்து பூமியில் வாழும் உயிர்களைக் காக்கும் வகையில் ஓசோன் படலம் உள்ளது. இந்த வாயுப் படலத்தில் ஓட்டை விழுந்துள்ளதாகவும், குளோரோ புளூரோ கார்பன் மற்றும் தொழிற்சாலைகளின் புகையால் ஓசோன் படலம் பாதிக்கப்படுவதாக கண்டறியப்பட்டது.  

பிரிட்ஜ், ஏசி போன்ற மின் சாதனங்கள் குளோரோ புளூரோ கார்பன் என்ற வாயுவை அதிகம் வெளியிடுவது ஓசோன் பாதிப்புக்கு முக்கியக் காரணியாகும். ஓசோன் படலத்தில் உண்டான துளை தற்போது மெல்ல சீரடைந்து வருகிறது என ஐ.நா. சபை தெரிவித்துள்ளது. ஓசோன் படலத்தை பாதுகாப்பதற்கு எடுக்கப்பட்ட நடவடிக்கைகளால் அண்டார்டிகாவுக்கு மேலே ஓசோன் படலத்தில் ஏற்பட்ட துளை சுருங்கியுள்ளது என ஐ.நா. அறிக்கையில் தெரிவிக்கப்பட்டுள்ளது. 2030ஆம் ஆண்டுக்குள் ஓசோன் படலம் பழைய நிலைக்கு வந்துவிடும் என கணிக்கப்பட்டுள்ளது.