அன்பருடன் அதிகாலைத்துளிகள் RVA Morning Prayer

சாவின் இருள்சூழ் பள்ளத்தாக்கில் நான் நடக்க நேர்ந்தாலும், நீர் என்னோடு இருப்பதால் எத்தீங்கிற்கும் அஞ்சிடேன்; உம் கோலும் நெடுங்கழியும் என்னைத் தேற்றும் - திருப்பாடல்கள் 23:4. அந்நாள்களில் எசேக்கியா ராஜா நோயுற்றுச் சாகும் தருவாயில் இருந்தார். இறைவாக்கினர் எசாயா அவரிடம் வந்து, “ஆண்டவர் இவ்வாறு கூறுகிறார்: நீர் உமது வீட்டுக் காரியங்களை ஒழுங்குபடுத்தும்; ஏனெனில் நீர் சாவினின்று பிழைக்க மாட்டீர்” என்றார்.

எசேக்கியா சுவர்ப் பக்கமாய் முகத்தைத் திருப்பிக் கொண்டுஆண்டவரை நோக்கி, “ஆண்டவரே! நான் எப்படி உம் திருமுன் முற்றிலும் நம்பிக்கைக்குரியவனாய் நடந்து கொண்டேன் என்பதையும், உமது பார்வையில் நேர்மையானதையே செய்தேன் என்பதையும் நினைத்தருளும்” என்று வேண்டுதல் செய்து கதறி அழுதார்.

ஆண்டவரது வார்த்தை: உன் மன்றாட்டைக் கேட்டேன். உன் கண்ணீரையும் கண்டேன். இதோ உன்னைக் குணப்படுத்துவேன். இன்றைக்கு மூன்றாம் நாள் நீ ஆண்டவராகிய எனது இல்லத்துக்குச் செல்வாய். உனது ஆயுளுக்கு இன்னும் பதினைந்து ஆண்டுகள் கூட்டுவேன் என்றது. நம் ஆண்டவர் மரண இருளின் பள்ளத்தாக்கில் இருந்து நம்மை காத்து நம்மை அழிவினின்று மீட்கின்ற ஆண்டவர்.

மலர்மிசை ஏகினான் மாணடி சேர்ந்தார்

நிலமிசை நீடுவாழ் வார்.

உரை: மனமாகிய மலர்மீது சென்று இருப்பவனாகிய கடவுளின் சிறந்த திருவடிகளை எப்போதும் நினைப்பவர் இப்பூமியில் நெடுங்காலம் வாழ்வர்.

ஜெபம்: எத்தனையோ ஆபத்துக்களில் இருந்து எங்களை காத்தவரே உமக்கு நன்றி. உமது  கோலும் நெடுகழியும் எங்களை தேற்றுவதற்காக உமக்கு நன்றி. உமது சிறகுகளின் நிழலில் எங்களுக்கு பாதுகாப்பு தந்ததற்காக உமக்கு நன்றி. ஆமென்.